أخبار عاجلة
عادل كرم… صوت “الشارع” بدون أي منازع

عادل كرم… صوت “الشارع” بدون أي منازع

إيلي أبو نجم – رأي بتجــــــــــــرد: أطلق الإعلامي عادل كرم مبادرة خلال برنامج “هيدا حكي” عبر قناة الـMTV طالباً تعاون كافة الزملاء الإعلاميين.

وفي التفاصيل، أنه في افتتاح الحلقة طلب عادل كرم من المخرج عدم توقيف التصوير ووجه رسالة، جاء فيها: “بالإذن من الجميع… أنا عادل كرم صرلي 25 سنة بشتغل بهيدا المجال، وطول عمرو في منافسة، وكل عمرنا نعمل شغلنا ونعمل يلي علينا وبس، وطول عمرها المنافسة شريفة… بمعنى إنو كلنا سوى يلي منشتغل بهيدا المجال منعمل شغلنا وهدفنا نسلّي المشاهد ونضحّكو…”. وعبّر عن إستيائه من الحالة آلت إليها الأمور وقال: “وصلنا لمحل ما بقى حدا طايق التاني ولا حتى المشاهد طايقنا، وأنا شخصياً ما بقى طايق يلي عم بيصير”.

كما وأطلق مبادرة فريدة طلب من كل الإعلاميين مشاركته بها وقال: “أنا اليوم بدي قوم بمبادرة وبتمنّى على كل الإعلاميين يمشو معي فيا… كفى… كفى ننشر غسيلنا الوسخ على تلفزيونات العالم ببيوتها…”.

عادل كرم وضع المشاهد اللبناني والعربي فوق كل الإعتبارات مسلطاً الضوء على الهدف الأساسي من كل البرامج الترفيهية التي كاد أن ينساه البعض وقال: “يا خيي هيدا المواطن يلي قاعد بالبيجاما المقلّمة ببيتو وحاطط إجريه بجاط مي سخنة وملح وحاطط الألوسة وقاعد هو ومرتو وولادو، وناطر الساعة 8:30 تتخلص سمّة البدن والقرف تبع الأخبار كرمال يتسلّى ويتضحك، هيدا شو إلو بالـRating، شو بيعنيلو إذا عادل كرم وبيار رباط جاب Rating أكتر من غيرو، وشو فارقة معه إذا رجا ورودولف عملو Trending ع تويتر نهار السبت؟”

وأضاف: “يا خيّي يلي بيحبّ رقص الصالونات بيحضر Dancing with the Stars ويلي بيحبّ يشوف مين بيضهر مع مين مع شوية تلطيشات Sex بيحضر شي تاني” وتابع: “أكتر من هيك، خليني هون إحكي عن حالي وعن برنامجي بالتحديد، هيدا حكي لمين؟ لإلكن… يلي بدو يحضرنا يحضرنا، ويلي بدو يحضر غير برنامج، يحضرو. وين المشكلة؟”.

وفي خطوة لا يتجرأ كثر على القيام بها أكّد عادل كرم أنه وفي كافة الملفات التي تطرّق إليها في برنامج “هيدا حكي” لم يكن المقصود منها التجريح بأي شخص على الإطلاق إنما إنتقاد بعض الأمور لتصويبها وقال: “ما بدها هلقد، في كتير ملفات حامية مرقت بهيدا حكي، بدكن اكتر من قصة أحلام، هيدا الموضوع بالنسبة لإلنا صفحة وطويناها… وحتى الحلقة الماضية ويلي صار فيا لغط حول قصة “بيت بليق”، أنا بدي قول إنو أنا كنت عم بنتقد برنامج “بلا تشفير”، وعالأكيد ما كان مقصود التجريح بعَيلة بليق، يلي بتجمعني فيا صداقات وعلاقات كتيرة… بكل الأحوال، إذا إنفهم تعليقي غلط او إتفسّر بطريقة تانية، مش مشكلة، أنا عادل كرم عندي الجرأة قول “حقكن عليي”… هيدا ما بيعني إنو برنامج “بلا تشفير” ما بقى رح اتناولو، ورح تشوفو بعد شوي”.

وختم عادل كرم كلامه بأسلوبه الخاص وقال: “يعني من الآخر، ما في داعي بقى نبهدل بعض عالشاشات وعالسوشل ميديا، وكلّو تحت عنوان بيّي أقوى من بيّك… وهيدا حكي”.

بتجــــــــــــــــرد، ما قام به عادل كرم خلال إفتتاحية “هيدا حكي”، ليس كلاماً وخطابات الهدف منه “إن نعبّي الهواء”، رسالة عادل أمس أكبر من كل إعتبارات البرامج التلفزيونية وتحتاج لشخص يملك ما يكفي من الجرأة والرقي لوضع حدّ لما وصلت إليه الأوضاع عبر الشاشة الصغيرة تحت لواء “الرايتنغ”.

قوّة عادل كرم اليوم أكبر من كل الأيام الماضية، فهذا الفنان ولد في عالم النجومية من رحم الجمهور اللبناني، وكان صورة المواطن، صوت الشارع ونجم الشعب مثبتاً من خلال مبادرته أمس أنه بقدر المسؤولية التي وضعت على كاهله فأعطى درساً في عالم تقديم البرامج سيبقى محفوراً في ذهن المشاهد لفترة طويلة.

إلى الأعلى