أخبار عاجلة
هيثم شاكر.. لهذا السبب أخفى مرضه عن والدته

هيثم شاكر.. لهذا السبب أخفى مرضه عن والدته

متابعة بتجــرد: خلال لقائه في برنامج “معكم” الذي تقدّمه الإعلامية منى الشاذلي على قناة cbc، تحدّث الفنان هيثم شاكر لأوّل مرّة عن مرضه قائلًا: “مش بحب أشارك مشاكلي الشخصية مع حد، بحب أتحمل مسؤوليتي لوحدي، ومش بحب أصعب على حد، ووالدتي توفيت من غير ما تعرف مرضي، بحمد ربنا على كل حاجة حصلتلي، اكتشفت إني عندي سرطان في القولون، واستسلمت زي أي حد، وسافرت أتعالج بره”.

وتابع: “قلت لكله عدا والدتي، وكنت شايف حياتي سودة، ومستنّي قدر ربنا، وحسيت إن حياتي هتنتهي، وفي دكتور نفساني متابع معايا، وقالي عيش اليومين اللي فاضلين دول، محدّش عارف الغيب، بدأت أتعلق بالحياة أكتر، وكنت شغال في ألبوم أحلى قرار، إلا أن ربنا منّ عليا بالشفاء، وربنا عالم بكل حاجة، ومش بيبعت حاجة وحشة، ومن حوالي 10 سنين أو أكثر، عملت عملية في معدتي، واكتشفت المرض بالصدفة، كانت قرح في البداية، وتحولت إلى سرطان، ووالدتي كانت بالنسبة ليا كل حاجة، علشان كده مرضتش أقولها، ومكنتش هتستحمل تعرف كده، ووفاتها كسرتني”.

واختتم هيثم شاكر حديثه مؤكداً: “المواقف بتبين الناس على حقيقتها، قولت للناس القريبين علشان يبقوا جنبي، ملقتهمش، وناس عرفت بالصدفة وفضلوا جنبي، اتغير في حياتي كتير جداً، الحياة مش مستاهلة أي حاجة، وعندي يقين إن ربنا هيعمل الأحسن للبنى آدم، مهما الواحد جري، القدر مكتوب، وواخد الـ24 قيراط كاملين، ولازم أسعى وأجتهد وأعمل اللي عليا، وأصبح بداخلي سلام أكثر، الصحة مفيش أغلى منها، وهي السند الحقيقي”.

إلى الأعلى